Бугунь, мартнынъ 1-де, эфсаневий "Таврия" такъымына 60 я тола.

Шимди клубнынъ, эм де бутюн Къырым футболынынъ вазиети, пек яхшы дегиль. Амма онынъ аджайип тарихы бар, ве бу тарих келеджекке умют иле бакъмагъа имкян бере.
"Таврия" ветеранларыны, мухлислерни, клуб иле багълы эр бир инсанны байрам иле хайырлаймыз!
Такъым 1958 сене мартнынъ 1-де тесис этильди. Башындан онынъ ады "Авангард" эди. "Таврия" ады тек 1963 сене берильди. Клубнынъ тюсю — къырмызы-беяз-мавы. Энъ юксек иришмелери (хронологик невбетте): УССР биринджилигининъ тунч гъалиби (1962, 1972 сенелери); УССР биринджилигининъ кумюш гъалиби (1970 с.); УССР чемпионы (1973, 1985, 1987 сенелери); УССР Купынынъ саиби (1974 с.); СССР биринджилигинде тунч гъалип (1977 с.); СССР биринджилигининъ гъалиби (1980 с.); УССР биринджилигининъ кумюш гъалиби (1986 с.); СССР Купынынъ яры финалджысы (1987 с.); мустакъиль Украинанынъ биринджи чемпионы, Авропа чемпионлар Купы оюнынынъ иштиракчиси (1992 с.); Украина купынынъ финалджысы (1994 с.); Интертото Купы оюнынынъ иштиракчиси (2001, 2008 сенелери); Украина Купынынъ саиби, Авропа Лигасы турнирининъ иштиракчиси (2010 с.).

Такъымнынъ эв стадионы — "Локомотив" (19 979 ер), шимдики вакъытта о Къырым Джумхуриет джыйма такъымларнынъ спортив азырланувы меркези деп, адландырыла.

Озь ишини 2014 сененинъ июнь айында токътатты.
"Таврия"нынъ халефи "ТСК-Таврия" ола (башындан — "ТСК"), о, 2014 сене июль айында тесис этильди. Шимдики вакъытта такъым Къырым футбол бирлигининъ (КФС) премьер-лига чемпионатында чыкъышта булуна. Къырым футбол бирлигининъ биринджи чемпионы (2015/16-мевсими), КФС-2016 Суперкупынынъ саиби.
crimeansport.ru