Къырым спортчылары парапланер спорты боюнджа Русиенинъ ачыкъ чемпионатында (Russian Championship Pre-PWC) мувафакъиет иле чыкъышта булундылар. Ярышлар Ставрополь дживарындаки Юца шеэринде кечти.

Акъмесджит сакини Глеб Сухоцкий парапланер спорты боюнджа Русие чемпионы олды. Къырым пайтахтыны такъдим эткен даа бир спортчы Дарья Новикова къадынлар арасындаки зачета кумюш медаль къазанды.

Къырымнынъ джыйма такъымы, яни онынъ теркибинде булунгъан акъмесджитлилер Глеб Сухоцкий, Вячеслав Копчинский, Сергей Чепелев ве Антон Гончаров — такъым зачётында биринджи! Бизим йигитлеримиз энди озь къырымлы джыйма такъымларыны яратмагъа ве дюнья Купында бу такъым иле иштирак этмек огърунда фикир этелер.
Къайд этмелимиз ки, Русиенинъ ачыкъ чемпионатында медаллер огърунда Русиеден ве бир сыра башкъа мемлекетлерден 145 спортчы курештилер.

"Крымский спорт" порталына Къырым Джумхуриетинде гъает енгиль авиация бирлешкен федерациянынъ Русие Региональ болюгининъ президенти Глеб Сухоцкий хабер эткенине коре, сентябрьнинъ башында Коктебельге якъын Клементьева дагъында " Коктебель Купы " оюны кечириледжек. Бу ярышларда эм Къырымнынъ белли парапланеристлери, эм де континенталь Русиеден спортчылар иштирак этеджеклер.