Джума эртеси куню, октябрьнинъ 27-де, Къырым мусульманларынынъ VI Къурултайынынъ делегатлары Муфти аджы Эмирали Аблаевнинъ векялетлери муддетини девам эттирдилер. Шимдики муфтиге ишанч рейлернинъ эксериети иле ифаде этильди.  Къурултай  делегатлары эм де Ревизион комиссиянынъ янъы теркибини сайладылар, анда беш инсан кирди.

Аблаев рей берювнен эвель топланларгъа муфти вазифесини беджергенден берли озь иришмелери акъта тариф этти: Акъмесджитте Джума джами къуруджылыгъы акъта, джумхуриет мусульманларынынъ культ иншаатлары къайтарылувы акъта, регионларда маариф ве хайрие фаалиети акъта.

Эмирали Аблаев 1962 сене Озьбекистанда догъды. 1988 сене Къырымгъа къайтты ве Ислям Терек районынынъ Тувуш Акъчора, яни Долинное коюнде яшап башлады. 1993 сенеси кене шу районнынъ Джайлав Сарай, яни Золотое поле коюнинъ имамы оларакъ сайланды.

1998 сене Туркиеде Маниса  медресесинде тасиль алды ве шу сене аджылыкъкъа барды.  Къырым муфтиси вазифесине илькиде 1999 сайлангъан эди. Бундан сонъ даа учь кере тайинленди.

Эмирали Аблаев эвли, онынъ эки къызы, бир огълу ве дёрт торуны бар.