Ноябьнинъ 28 куню Киев ниает мемлекетте арбий вазиет акъта къанунны нешир этти. Оны учь кунь бекледилер. Башында Рада сессиясында мебуслар сонъки весикъа иле таныш олмагъандже рей бермеге ред эттилер. Сонъра «Урядовый курьер» адлы ресмий вестникте хата  къачырылып, эмирни бир айлыкъ муддет ерине, эки айлыкъ муддетке нешир эттилер. Ниает, къабул этильген къанун эм Украинада, эм де бутюн дюньяда суаллер догъурды. Ве олардан энъ эсасы арбий вазиет территориялары акътадыр.

Хатырлатамыз, башында арбий вазиет кирсетмекни СНБО идаресининъ башы Турчинов тевсие этти. Порошенко бу гъаеге джевап берди ве Юкъары Раданы бу азырланаяткъан весикъаны бакъмагъа риджа этти. Бундан сонъки денъишмелер президентнинъ тешеббюси боюнджа кирсетильди.

«СНБО Украинада айры укъукъий низам кирсетмекни зарур деп, бельгиледи. Бу силялы агрессиягъа джевап бермек ве миллий хавфсызлыкъны темин этмек, девлет мустакъиллигине ве территориаль бутюнлигине телюкелерге джевап бермек ичюн. Бу себептен президентке Украинада 60 суткагъа арбий вазиет кирсетмеге тевсие этильди», − биринджи оларакъ Турчинов бильдирди.

Берильген вакъытта Рада бирден къарар алып оламады. Башында минберни Олег Ляшко ве онынъ аркъардашлары блок эттилер. Меджбурий тенеффюс бир къач саат девам этти, президентисе атта бинаны терк этти. Анълашылмагъан весикъанынъ «Украинада 60 суткалыкъ муддетке арбий вазиет кирсетмек» мундериджесине бирден учь фракция наразылыкъ бильдирди, бу Тимошенконынъ «Батькивщина»сы, Львов шеэр башы Садовойнынъ  «Самопомощь» фракциясы ве  Ляшконынъ Радикаль фиркъасы олды. Олар муддетни экиге къыскъартмагъа талап эттилер. Сёз сырасы, тамам шу фракциялар РФ иле дипломатик мунасебетлерни бозмагъа ве тиджаретни ясакъ этмеге  талап эттилер.

Нетиджеде президент парламентарийлернен къысмен разы олды, арбий вазиетнинъ муддети къыскъартылды, виляетлерни исе айры-айры яздылар: Луганская, Донецкая, Винницкая, Николаевская, Одесская, Сумская, Харьковская, Черниговская, Запорожская, Херсонская эм де Азакъ-Керич акваториясынынъ ички сувлары.  Луганск ве Донецк виляетлери ве регионлары иле эр шей анълайышлы, оларнынъ сынъырлары Русие иле бир келе. Винницк виляети Приднестровьенинъ къомшусы ола, Одесса, Херсон ве Запорожье виляетлерининъ сынъырлары  Къырым иле расткеле.  Бу исе энъ меракълысы. Не ичюн къанунда Мухтарий Къырым Джумхуриети ёкъ? О, Порошенконынъ биринджи эмиринде Донецк ве Луганск виляетлери иле бир сырада «Русие Федерациясы иле ишгъаль этильген» территория оларакъ бар эди де? Ве не ичюн арбий вазиет тек Аакъ-Керич акваториясында илян этильди, Къара денъиз акватории\ясында исе ёкъ?

Бу Къырымны ве Акъярны эмирге къошмагъа унутты, демекми? Бунъа ошамай, чюнки арбий вазиет кирсетильмеси ичюн себеп олгъан провокация озю Къырым иле багълыдыр. Бу весикъа Одесса, Херсон ве Запорожье виляетлерини санки сынъырда деп таный. Амма олар не иле сынъырланалар, яюнки Украина Къырымны озюнинъки деп сая да?

Афсуз ки, регионларнынъ тамам бойле джедвелини ким тизгени белли дегиль. Ве Къырым анда асылында бар эдими? Амма онъа бинаен энди Къырым иле сынъырда кечюв низамы къаттыджа олды. Бойле этип Украина Къырымны башкъа девлет территориясы деп, таный. Ресмий Киевде, не ичюндир, бу делильни ве бу киби муим шейлерни ич те музакере этмейлер.