Яндекс аналитиклери Народная карта сайтынынъ малюматыны огрендилер, ве Русие шеэрлерининъ «мемориаль»  бегенювлерини бельгиледилер. Мемлекетте эр ерде ерлештирильген  абиделер бар, эм де конкрет территорияларнынъ тарихы иле багълы региональ хусусиетлер бар. 

Бойлеликнен, беклегенимиз киби, энъ сыкъ даркъалгъанлар арасында Ленинге (1-нджи ер) ве Пушкинге (2-нджи ер) багъышлангъан монументлер олдылар. Бундан сонъ джевельде бир-бири артындан Киров, Горький, Гагарин ве Дзержинский ерлешелер. Сыкъ алда языджы-классиклерге (мисаль ичюн, Лермонтов ве Толстойгъа) багъышлангъан абиделер олар олгъан ерлерде расткеле. Я да совет девири ичюн азиз олгъан шахысларгъа, арбий мудирлерге я да сиясетчилерге багъышлангъанлар эр ерде расткеле (мисаль ичюн, Жуков, Калинин ве Маркс).

Мемлекетте айванларгъа багъышлангъан монументлер де аз дегиль. Оларнынъ энъ буюк сайысы – 13,1% — бу аювлар тасвири.

Оларнынъ арасында юнус балыкълары да бар (2,1%), эм де динозаврлар (3,4%), пардош ве мышыкълар (2,4%).

Айрыджа мемориалларнынъ адлары ве оларда чыкъ расткельген сёзлер талиль этильди. Бутюн мемлекетте бу Ленин ве дженк олгъаны аныкъ олды.

«Мисаль ичюн, Архангельск виляетинде Ломоносовгъа монументлер, эм де серлеваларында «интервенция ве север» сёзлери олгъан абиделер чокъ. Калининград виляетинде «первая мировая, красная армия ве кант» козьге корюне. Тула виляетинде шахтерларгъа ве Толстойгъа багъышлангъан монументлер чокъ, къалгъан абиделернинъ адларында «бессмертие» сёзю сыкъча расткеле. Къомшу Орёл виляетинде эдебий топ — тургенев, фет, бунин. Нижний Новгород абиделерине аит олгъан сёзлерден Горьковский автомобильный завод адыны яратмакъ мумкюн», — деп, языла Яндекснинъ аналитик малюматында.

Къырым акъкъында айтсакъ, сыкъ къулланылгъан сёзлер бойле: односельчанин, партизан, десант. Башкъалар арасында: Шевченко, морской, дивизия, депортация, сражение, гагарин, партизан, армия.

Абиделернинъ умумий сайысындан 51,5% дженкке багъышлана. Умумий нисбетлешювде оларнынъ сайысы тек Челябинск шеэринде ве виляетинде  (29,2%), эм де Санкт-Петербургда ве вилятетте (47,7%) азджа. Москвада ве Москва виляетинде, меселя, карта «дженк» мевзусына багъышлангъан 71,1% монументни сайып чыкъты.

«Девлет» мевзусына Къырымнынъ  31,3% абиделери багъышлангъан, ходжалыкъкъа ве илимге – 5,2%, медениетке – 9%, фелякетлерге – 0,7%, репрессияларгъа – 2,2%. Сонъки косьтергич регионда башкъа виляетлерге бакъкъанда юксекче, чюнки репрессиялар сырасына эм де сюргюнлик кире. Бойлеликнен, меселя,  Нижний Новгород виляетинде репрессияларгъа абиделернинъ 0,4% багъышлана, Воронеж виляетинде исе олар ич те ёкъ.

Ярымадада монуметлернинъ топ-джедвели бойледир:

  1. Ленин
  2. Пушкин
  3. Киров
  4. Горький
  5. Гагарин