Русие акимиети  Къырым Джумхуриети ве Акъяр боюнджа  Федераль макъсадлы программасынынъ муддетини эки йылгъа девам эттирди —  2022 сенегедже. Эм де малие айырылувы 40 млрд рублеге, яни 877,8 млрд рублегедже арттырылмакъ керек. Бу акъта укъукъий малюмат порталында нешир этильген къарарда сёз юрьсетиле.

Башындан программа 5 йылгъа — 2020 сенегедже  ниет этильген эди. О, регионда муэндислик, накълие ве ичтимаий инфраструктураларны модернизация этмек ичюн амельге кечириле. Программа боюнджа эсас объектлер: Къырым копюри,  «Таврида» трассасы,  энергокопюр, Акъмесджит ава лиманынынъ янъы терминалы, эки сыджакълыкъ электростанция, шаркъий Къырымны сув иле темин этмек ичюн муэндислик иншаатлар ве медений мирас сайылгъан объектлернинъ гъайрыдан тамир этилюви.