Къырымнынъ шималинде авагъа белли олмагъан шей аттырылувынынъ себеби, эвельки малюматларгъа коре, «Крымский Титан» адлы завод («Титановые инвестиции» ООО идаресининъ филиалы) къуллангъан  кислотонакопительнинъ ичинден бувланув  ола. Бу акъта экспертизанынъ нетиджелери боюнджа Къырым акимиетининъ вице-премьер назири Игорь Михайличенко хабер этти.

Къырымнынъ шималинде учь химик муэссиседе тешкерюв кечирильди — бу «Крымский Титан», «Крымсода» ве «Бром» муэссиселери. Ава пробалары сагълыкъ ичюн хавфлы шейлерни косьтермеди.

«Тедкъикъатларнынъ эвельки малюматларына коре, мадде даркъалувынынъ себеби «Титановые инвестиции» ООО идаресининъ филиалы къуллангъан кислотонакопитель  ичиндеки бувланув  ола. Бу адиседен эвель ава арарети девамлы вакъыт  котерильди, ич бир ягъанакълар олмады, эм де кислотонакопитель ичинде сув севиеси эксильди», — деди журналистлерге Михайличенко.

Онынъ сёзлерине коре, Эрмени Базарда даима экспертлер такъымы чалыша, олар ава теркибини талиль этелер, шеэрнинъ прокуратурасыкислотонакопитель къуллангъан вакъыт тапылгъан бозувлар ёкъ этилюви акъта весикъа азырлай.

«Къырым джумхуриетининъ акимиети иле бу вазиетнинъ акъибетлерини ёуъ этмек ичюн эписи керекли чарелер бакъыла. Шу джумледен кислотонакопитель толдурулувы ичюн сув менбаасы араштырыла», — деп, къошты Михайличенко.

Эвеллери ярымаданынъ шималинде белли олмагъан мадде аттырылып даркъалгъаны себебинден эвлернинъ дамларында ве тереклернинъ япракъларында сары тюсте ягълы пас пейда олгъаны акъта малюмат селендирильди. Эрмени Базар шеэрине Къырымнынъ  экология ве табиат ресурслары назирлигининъ мутехассыслары, Роспотребнадзор ве прокуратура идарелерининъ векиллери барып еттилер. Керекли тедкъикъатлар ичюн пробалар алынды. Красноперекопск шеэрининъ сакинлеринден де шикяетлер олды.