РФ Девлет дума мебусы ве Къырымнынъ сабыкъ прокуроры Наталья Поклонская акъайгъа чыкъты. Бойле хабер энди бир къач кере кутьлевий малюмат васталарында пейда олды. Амма шимди чешит менбаалар белли сиясетчи сайлагъан инсаннынъ адыны ачтылар. Daily Storm хабер эткенине коре, Поклонскаянынъ омюр аркъардашы Къырымда инсан акъ-укъукълары боюнджа векялетлининъ аппараты ребери Иван Соловьев олды.

Эвленюв мерасими Къырымда августнинъ  11-12 куньлери кечти. Мусафирлер тариф эткенлерине коре, «той орта къарар олса биле, онынъ озь услюби олды». Байрамгъа Поклонскаянынъ Девлет дума ве кучь структуралары боюнджа зенаатдашлары давет этильди.

Поклонская озю неширге хабер этти ки, озь шахсий яшайышы акъта тевсирлер бермеге азыр дегиль. Затен, бу журналистлерге зан этмеге кедер этмей. Биринджи омюр аркъардашы иле о, дюньяда энъ мешур прокурор олмаздан эвель айырылды.  Ондан депутатнынъ къызы осе.

Бундан сонъра о янъы акъайы иле бахтлы олгъаны акъта айткъан эди, амма о акъта декларацияда язмай эди. Кутьлевий малюмат васталарында бу намзет акъта чешит фикирлер олгъан эди. Бираз сонъра Поклонская озю итираф этти ки, о вакъыт бу тек мунасебетлер ве эвленмек акъта планлар эди.

«Амма, афсуз ки, ойле олды ки, биз сагълыкълаштыкъ. Онынъ ичюн бир де бир кимсени декларацияда омюр аркъардаш этип косьтермедим, чюнки о ёкъ», — деп, тариф этти мебус.

Поклонскаянынъ тахмин этильген янъы омюр аркъардашы, Иван Соловьев акъта о, ФССП идаресинде айрыджа муим ишлер боюнджа уйкен такъикъатчы вазифесини беджергени белли, 2011-2013 сенелери о, Девлет думанынъ коррупциягъа къаршы хавфсызлыкъ боюнджа комитетининъ аппаратында ёлбашчылыкъ этти, сонъра исе инсан акъ-укъукълары боюнджа векялетлининъ аппаратына чалышмагъа кечти.