Премьер-назир Дмитрий Медведев Табиат назирлигине Къырымны сув иле темин этмек боюнджа иш группасыны шекиллендирмекни авале этти. Бойле авале назирлер кабинетининъ сайтында нешир этильди. Бойле къарар ярымаданынъ ичтимаий-икътисадий инкишафы акъта топлашув нетиджесинде къабйл эттилер. Топлашувны Медведев КъДж ве Акъяргъа иш зиярети черчивесинде кечирди. 

«Къырым ярымадасыны ве башкъа сув етишмеген регионларны сув иле темин этюв суаллери боюнджа идареара иш гурпасыны тизмек ве тасдыкъламакъ, онынъ теркибине Русие Мудафаа назирлигининъ, «Росатом» адлы девлет корпорациясынынъ, Русие илимлер академиясынынъ векиллерини ве Русие Федерациясынынъ мерагъы олгъан субъектлерини джельп этмек. Бу иш группасы черчивесинде Русие Федерациясынынъ субъектлеринде сув етишмемезлигини ёкъ этмек суаллерини чезмек боюнджа программаны ишлеп чыкъармакъ ве такъдим этмек», — деп. языла месаджда.

Аваледе къошула ки, нетиджелер акъта акимиетке сентябрьнинъ 10-на къадар эсабат бермек керек.

Эм де РФ кой ходжалыкъ ёлбашчысына Дмитрий Патрушевге сентябрьнинъ 25-не къадар Къырымнынъ агросанайи комплекси инкишафыны стимулламакъ боюнджа чарелерни ишлеп чыкъармакъ керек. Иджа акимиетининъ федераль органларына, эм де Къырымнынъ назирлер шурасына ве Акъяр акимиетине «тайинленген муддетте федераль-макъсадлы программа тедбирлери беджерилюви боюнджа чарелер бакъмакъ» авале этильди.