Къырымда апрельнинъ 19 куню IV Ялта халкъара икътисадий форумы (ЯХИФ) ачылды. Бу сене тедбир мусафирлери Европа, Асия, Африка, Латин Америка мемлекетлеринден сиясетчилер ве бизнесменлер эйетлери олдылар.

Тедбирнинъ иштиракчилерини ве мусафирлерини озь Facebook саифесинде Сергей Аксенов селямлады.

«Бизим мусафирлеримиз эалиси 3 млрд адамдан зияде олгъан мемлекетлерни такъдим этелер. Яни инсаниетликнинъ эксерий къысмыны. Бу делиль Русие ве русиели Къырым дюньядан айырылгъаны, узюльгени акъта чешит фикирлерни ёкъ эте. Къайд этем ки, бу куньлерде ЯХИФ мейданларында Къырым достлары Халкъара бирлешмесининъ топлашувы кечеджек, оны яратмакъ акъта къарар кечкен сене ЯХИФ иштиракчилернинъ тешеббюси иле къабул этильген эди», — деп, язды Аксенов.

Къырымгъа Суриеден буюк эйет кельгени эмиетли вакъиалардан бири олды. Эйетнинъ ребери Суриенинъ тышкъы тиджарет ве икътисадиет назири Самер аль-Халиль олды. Сурие эйети тахминен 80 адамдан ибарет. Кельгенлер арасында эм де буюк бизнес векиллери де олды.

Бу сене форумнынъ эсас мевзусы – «Будущее мира. Будущее России». Айры алда, IV ЯХИФ черчивесинде четэль зенаатдашларнен ишбирлик, банк саасынынъ инкишафы, икътисадиет, спорт, кой ходжалыгъы, накълие, информацион технологиялар, экология, сагълыкъ сакълав, медениет, эм де миллетлерара мунасебетлер инкишафы музакере этильмеси планлаштырыла.

Форум куньлери девамында 67 тедбир кечириледжек, олардан 40-тан зиядеси  – иш боюнджа:  пленар топлашувлар, махсус секциялар ве иш сабалыкълары. Бу сене 60-тан зияде мемлекеттен 3 бинъге якъын иштиракчи планлаштырыла. Айры алда, бу Латин Америка, Къытай, Япония, Чехия, Италия, Френкистан, Австрия, Алмания, Ирландия мемлекетлери. Бу сене биринджи кере иштирак эткен мемлекетлер – Исландия, Бельчика ве бир сыра Африкан мемлекетлер.