Базар эртеси куню, апрельнинъ 16-да, Москва сааты иле саба 08:20 «Симферополь» халкъара ава лиманынынъ  янъы терминалы биринджи рейсни къабул этти. Бу акъта аэровокзалнынъ матбуат-хызмети хабер этти.

Биринджи ёлджу Москва сакини Светлана Коврижина къызынен олдылар. Келюв зонада оны джумхуриетнинъ башы Сергей Аксенов ве ава лиманнынъ  генераль мудири Евгений Плаксин къаршыладылар. Светлана хатыра багъшышлар, бизнес-залда бедава хызмет алувгъа ве Москвагъа бедава учувгъа сертификатлар эльде этти.

© Пресс-служба Международного аэропорта «Симферополь»
«Симферополь» ава лиманынынъ янъы терминалы биринджи рейсни къабул этти

«Эр кезни ильк ёлджулар иле хайырлаймыз», — деди журналистлерге Къырым башы Сергей Аксенов.

Ёлджулар ичюн бу куню эглендже программа азырланды, онынъ концепциясы янъы футуристик терминалнынъ дизайны иле багълы, ве  «Шаг в будущее» деп, адланды. Ава лиманнынъ хадимлери иле бераберликте мусафирлерни келеджек акъта фильмлернинъ къараманлары – роботлар, голограммалар, гиноидлер къаршылайджакълар. Бутюн кунь девамында ёлджулар ичюн футуристик фотозоналар чалышшаджакъ.

Денъиз далгъасы шекилинде бинанынъ къуруджылыгъы эки йылгъа якъын девам этти.  Терминал Акъмесджиттен 14 километр узакълыкъта ерлеше. Базар куню терминал ве эписи хызмет-техник биналар Росавиация ширкетинден эксплуатациягъа кирсетилюв ичюн рухсет эльде эттилер.

Янъы ава лиман къуруджылыгъына инвестицион разылыкъ 2016 сене апрель айында II Ялта Халкъара икътисадий форум черчивесинде имзалангъан эди. Янъы терминал девлет-шахсий ортакълыкъ умделеринде тек 22 ай девамында тикленильди.  Малиенинъ 30% инвесторлар эсабындан джельп этильди, къалгъан 70% —  Къырымда ресмий оларакъ чалышкъан банкларнынъ кредитлери эсабындан. Джумхуриетнинъ пайы янъы ава лиманда 49% тешкиль эте, къалгъан 51% — инвесторларгъа аит. Инвестицияларнынъ умумий колеми 32 млрд рублени текшиль этти.

Янъы аэровокзаль комплексте ёлджуларнынъ онъайтлыгъы ичюн 28 лифт, 16 эскалатор, секиз телетрап ве перрон автобусларгъа  секиз чыкъыш  мевджут.