Къырым муфтияты ве араштырыджылары тек бир сутка девамында Улу Ватан дженки девиринде эляк олгъан къырымтатар инсаннынъ аилесини таптылар. Джума куню, апрельнинъ 6-да Къырым мусульманлары Диний идаресининъ Facebook саифесинде "Келинъиз, бераберликте аскернинъ такъдири акъта онынъ тувгъанларына хабер этейик!" деген малюмат ерлештирильген эди. Бойле тешеббюс Керич араштырыджыларында пейда олды. 

"Белялов (Билялов) Резул, 1921 сене догъгъан, къырымтатар. Эсирликте эляк олды. Онынъ джеседи 2009 сенеси Мурманск виляетинде арбий аскерлер ичюн сабыкъ лагерь еринде араштырув ишлер кечирильген вакъыт эксгумация этильген эди. Аскер "Долина Славы" адлы арбийлер мезарлыгъында дефн этильген, — деп. Языла эди месаджда. Бу метинге немсе тильде персональ карта ве фото къошулгъан эди. Малюмат ичтимаий агъларда даркъатылып башланды.

Эрнест Кешфи озь ичтимаий саифесине тек эки афта эвельси кирди. Акъшам кеч олгъанда Facebook агъына кирип, хаьерлернен таныш олмагъа къарар алды. Ве бирден арбий эсирнинъ фотосурети тюбюнде таныш сойадны окъуды.

"Меним къартбабам тариф эткен эди, дженк вакъытында онынъ  бабасы ве агъасы гъайп олгъан эдилер. Олар Багъчасарай районында бир койде яшай эдилер. Бу кой энди чокътан ёкъ. Оны дженктен эвель ордугъа чагъыргъан эдилер. Бир-эки айдан сонъ исе. Мен хатырлагъаныма коре, дженк башланды. Ондан сонъки мектюпни къоранта Харьков шеэринден алгъан эди. Биз къартбабамнынъ авалеси боюнджа оны чокъ вакъыт девамында эписи электрон архивлерде араштыргъан эдик. Шимди исе мен ичтимаий агъларда достларымнынъ арасында малюмат корьдим. Бойле этип чокътан берли араштыргъан адам тапылды", — деп, тариф эте Эрнест "Россия для всех" порталынынъ мухбирине.

Эрнест Кешфи къартбабасы Нури Билялов иле

Онынъ къартбабасы Нури Билялов бу сене 90 яшыны толдура.  Чокъ йыл эвельси гъайып олгъан агъасы акъта хаберден сонъ, о, торуны айткъанына коре, агъасынынъ джеседини ярымадагъа кетирмеге риджа этти.:

"Къартбаба агъасыны ана-Ватан топрагъына, Къырымгъа къайтармагъа истей. Мен оны тапкъан Москвадаки араштырыджылар иле багъланмагъа тырыштым. Амма олар багъда дегиллер, — орманларда экспедицииялар кечирелер. Амма о къардашлыкъ мезарлыгъында дефн этильгени акъта биз бильмеймиз. Шимди бизим вазифемиз — олдукъча зияде малюмат тапмакъ, не ерде, насыл ордуда хызмет этти. Онынъ акъкъында малюматымыз аз. Къартбабам башта мектюплерни сакълай эди, амма 1986 сенеси Къырымгъа кочкенде олар гъайып олдылар", — деп, пайлаша Эрнест "Россия для всех" порталы иле. О, озь аилеси адындан муфтият хадимлерине, эм де Керичте араштырув группанынъ векилине  Наталья Дзюбагъа чокъ йылларгъа сюрген аращтырувларда ярдым косьтергенлери ичюн тешеккюрлер бильдире.