Сентябрь айындан РФ эписи мектеплеринде, Девлет дума къабул эткен къанунгъа бинаен, «Тувгъан тиль» деп. адландырылгъан фен кирсетиле. Къырым мектеплери де истисна олмайджакъ. Бу акъта озь Facebook саифесинде Джумхуриетнинъ башы Сергей Аксенов язды.

«Бу пек догъру ве файдалы къарар, деп, саям. Къырым Джумхуриетинде учь девлет тиль – рус, украин ве къырымтатар, олар ярымаданынъ энъ чокъ сайылы халкълары ичюн тувгъан тиль сайыла. Ярамадамызда яшагъан халкъларнынъ векиллери эвель де мектепте тувгъан тиллерни огрене биле эдилер, амма факультатив шекилинде. Энди бу имкян къануний шекилинде ресмийлештирильди, окъув планларгъа керекли денъишмелер кирсетильди», — деп, язды Аксенов.

Къырымнынъ тасиль назирлигинде анълаттылар ки, бойле имкян ярымаданынъ сакинлерине эвель де бериле эди.

«Къырымнынъ миллий джемиетлери огърашкъан иш къануний шекильде пекитильди. Огренмек ичюн тек девлет тиллерни дегиль де, атта мисаль ичюн булгъар я да урум тилини сечмек мумкюн. Ана-бабалар ариза язмакъ кереклер», — деп, къайд эттилер назирликнинъ матбуат-хызметинде.

2018 сене август айында Русие президенти Владимир Путин тувгъан тиллер огренилюви акъта къанунны имзалады. Весикъагъа бинаен, мектептен эвель, башлангъыч ве эсас умумий тасильнинъ федераль девлет тасиль стандартлары РФ халкълар тиллеринден бири сайылгъан тувгъан тильде тасиль алувны темин этелер.

Къанун эм де бельгилей ки, къабул этильген я да башкъа ерге кечирильген вакъыт тильнинъ сербест сечилюви ана-бабаларнынъ (къануний векиллернинъ) аризалары боюнджа тайинлене.