Бу кузьде мемлетимизнинъ кинотеатрлеринде Керич богъазындан кечкен копюр акъта бедий фильм косьтериледжек,  деп, хабер эте «Крымский мост» адлы малюмат меркези.

«Режиссер Тигран Кеосаян ве саналаштырыджы-оператор Игорь Клебанов «Крымский мост. Сделано с любовью!» адлы романтик комедия чыкъардылар. Сценарий муэллифи – Маргарита Симоньян, фильм ичюн музыканы Сергей Трофимов язды. Сюжетнинъ меркезинде – Керич богъазында буюк къуруджылыкъ ве онынъ эртафындаки яшайыш. Бу узакътан кельген къуруджыларнынъ ве ерли сакинлернинъ икяеси, Керич ве Тамань оларнынъ умумий эвлери олды», — деп. языла месаджда.

© Инфоцентр «Крымский мост»
«Крымский мост. Сделано с любовью!» фильмининъ съёмкалары

Кинолентанынъ сценарий муэллифи Маргарита Симоньян айтты ки, бу Къырым копюри къуруджылыгъы шараитинде севги акъта фильмдир.
«О, 40-нджы сенелери, дженк девиринде башлана ве бизим куньлеримизде, копюрде арекет ачылгъан куню екюнлей. Мен даа сценарий язмагъа башламаздан эвельси  биз бир къач кере копюрге кельген эдик, бакъмакъ, инсанларнен таныш олмакъ, къонушмакъ ичюн. Кимерлери фильнинъ прототиплери олдылар. Мисаль ичюн, Михалыча образы –катернинъ  капитаны – къуруджылыкъта чалышкъан адамдан язылды», — деп, яза малюмат меркези Симоньяннынъ сёзлерини.

Фильмде роллерни Ирина Розанова, Екатерина Шпица, Алена Хмельницкая, Лаура Кеосаян, Лариса Малеванная, Елизавета Мартинес-Карденас, Софья Зайка, Сергей Никоненко, Юрий Стоянов, Александр Ильин, Алексей Демидов, Артем Ткаченко, Сергей Газаров ве дигерлери иджра эттилер. Эпизодик роллерге ве кутьлевий манзараларгъа Къырым ве Кубань койлерининъ сакинлери джельп этильди.

Фильм кузьде прокаткъа чыкъаджакъ. Русие кинотеатрлеринде фильм ильк сефер ноябрьнинъ 1-де косьтериледжек. Съемкалар  Керич богъазында ве Тузла саасында реаль къуруджылыкъ шараитинде кечти. Актерлар муэндислер, монтажчылар, къайнакъчылар, машинистлер иле ян-янаша яалыштылар, олар да бедий фильмнинъ къараманлары олдылар.