Кезлевде яш олгъанына бакъмадан, Къырымда ве ондан тыш белли къырымтатар рессамы Ленур Велиляевнинъ сергиси ачылды. Сергининъ серлевасы «Тёплый Крым». Серги залынынъ онлардже зияретчиси бирден къыркътан зияде озьгюн эсерни корьдилер.

«Теплый Крым» адлы серги парлакъ олгъанынен, онда о къадар чокъ кунеш, ярыкъ ве сыджакълыкъ олгъанынен джельп эте. Къырымны, айры алда Кезлевни бильгенлер,  Ленур Велиляевнинъ манзараларында севимли ерлерни къолайлыкънен танырлар. Онынъ эписи ресимлери Къырым мевзусыны акс эттирелер. Озь услюбини о экспрессионизм, деп, бельгилей. 15 йыллыкъ иджат ёлунда Ленур чокъ эсер яратты, олар бутюн дюньягъа даркъалды.

Сергиде Ленур сонъки бир къач йыл девамында яраткъан эсерлер такъдим этильди.

«Бу эм Дженюбий ялы, эм Бахчасарай районы, эм де Къырымнынъ чокъусы башкъа кошелери. Амма Кезлев – бу меним тувгъан шеэрим, мында мен эр сефер озюм ичюн янъы, севимли бир шейлер тапам. Мен Кезлевнинъ шаркъий колоритины, къырымтатар къавесининъ къокъусыны, эски тар сокъакъларны, джамилерни, минарелерни тасвир этмеге тырыштым…», — деп, пайлашты «Россия для всех» порталы иле Ленур Велиляев.