Девлет Думада халкъларгъа къаршы репрессив актлар акълангъаны ве реабилитациягъа кедер этилюви ичюн джезаламагъа тевсие этелер. RT хабер эткенине коре, бу весикъанынъ муэллифи  Девлет думада миллетлер ишлери боюнджа комитетининъ реис муавини Руслан Бальбек олды.

Ишлеп чыкъарылгъан ильк къанун лейхасы боюнджа, сюргюн этильген халкъларнынъ реабилитациясына кедер этюв макъсадынен агитация ве пропаганда ичюн пара джезасы тайинленеджек. Бу адий гражданлар ичюн 3-5 бинъ рубле, вазифедар шахыслар ичюн 5-10 бинъ рубле, укъукъий шахыслар ичюн 30-50 бинъ рублени тешкиль этеджек.

Къануннынъ экинджи лейхасы зорлукънен кочюрильген ве реабилитация этильген халкъларны танымамакъ я да оларгъа къаршы арекет этмек ясакъ этиле. Бозувлар ичюн гражданлар 3 бинъден 5 бинъгедже пара джезасы я да 20 саатлыкъ меджбурий ишлер иле джезаланаджакъ, вазифедар шахыслар 5 йылдан 10 йылгъадже рубле, укъукъий шахыслар исе 30-50 бинъ рублени тёлейджеклер.

«Ичтимаий агъларда ве кутьлевий малюмат васталарында бутюн миллет фашистлерге ярдым этювде къабаатлагъан ашалама мальземелер даркъатыла. Саткъынлыкъ делиллери, эм де къараманлар эр бир миллетнинъ тарихында олды, амма миллий алямет боюнджа эписи инсанларны къабаатламакъ догъру дегиль. Миллий зыддиетлерни чокълаштырмакъ ичюн бу усулны гъарбий мемлекетлер къулланалар», — деп, анълатты Бальбек озь тешеббюсини.

Русие Федерациясы Президентининъ N 268 «Эрмени, булгъар, юнан, къырымтатар ве немсе халкълары реабилитация этилюв чарелери ве оларнынъ гъайрыдан тикленилювине девлет дестеги акъта» эмири 2014 сене апрельнинъ 21 къабул этильди – Къырым Русие иле бирлешкен сонъ бир айдан сонъ.