«Матч ТВ» янъы шоуны башлады, онынъ биринджи къараманы Судакъ сакини Джамшид Исматиллаев олды. «Энъ кучьлюлер» яни «Самые сильные» — бу discovery элементлери олгъан программадыр, о Русиенинъ белли пельванлары акъта тариф этеджек. Телевизион такъым спортчынынъ тувгъан шеэрине ёл ала, онынъ яшайыш тарзыны ве идманлар кечирюв усулларыны огрене.

Джамшид Исматиллаев. Бою 178 см, чекиси – 128 кг. Яшы – 35 яш. 2013 сене о, 150 тонналыкъ теплоходны чекип олды. 2015 сене  вместе с силачом Эльбрус Нигматуллин деген пельван иле рекорд къойдылар, оны Гиннес рекордлар китабына кирсеттилер. Олар экиси 2500 тонналыкъ паромны котерип, чектилер. 2017 сене – янъы дюнья рекорды. 50 килолыкъ штанга иле Исматиллаев Ай-Петри дагъына котерильди – бу дюнья севиесинде 1234 метр юксекликтир. Энъ кучьлю къырымтатар йигитини ярымадада эр кес биле, мемлекет исе бу аджайип эриф иле илькиде таныш оладжакъ.

Алыпбарыджы Глен Куцовски рус тилинде яхшы лаф эте, АКъШ оськенине бакъмадан. Амма Джамшиднинъ ады ве сойадыны къыйынлыкънен айта, онынъ ичюн оны садедже Джем  деп, адлай. Судакъкъа кельгенинен, о биринджи невбетте пельван идманлар кечирген салонгъа ёл ала. Анда шакъаджы къырымлылар онъа «Новичок» язысы олгъан футболканы киймеге тевсие этелер. Глен шакъагъа къыймет кести ве бойле «унван»  иле о пек хавфлы оладжагъы акъта джевап берди.

Программа боюнджа алыпбарыджы ве пельван берабер идманлар кечирмектен гъайры, чыкъыш къараманынынъ вуджудыны тешкерелер, тыббий бакъувдан кечелер, онынъ яшайышыны, не ашагъаныны, алышкъанлыкъларыны ве кунь тертибини корьмек ичюн, булар эписи онынъ беденининъ алына насыл тесир эткенини анъламагъа тырышалар. Тиббий хадимлер Джамшидни бутюнлей нормаль деп, таныдылар, лякин онынъ вуджуды реаль яшына коре яш корюнгенини къайд эттилер. Генетика боюнджа мутехассыслар да ич бир уникаль «къувет кодыны» тапмадылар, тек кемиклери яхшы инкишаф эткенине дикъкъат айырдылар.

Батыр озь нетиджелерини исрарлы идманлар иле, рагъбетлигини исе – достунынъ тырышувлары иле анълата.

«Меним эписи рекордларымы Саша Кирьяков (белли блогер, актер, Судакълы фотоджы – муаррир) уйдурып чыкъара. Эм де бутюн карьерам – онынъ иши. О уйдура, мен исе буны техникий джеэттен насыл япмакъ акъта тюшюнем», — деп, итираф эте Исматиллаев.

Александр ве Джамшид бераберликте къувет туризмини уйдурдылар ве рагъбетлештирдилер. Бу ёнелиште озюни сынамакъны эм де Гленге тевсие эттилер. Онъа омузларгъа 20 килолыкъ штанганы алып Новый Свет деген ерде Къапчыкъ бурунында тёпеге кезинмеге теклиф этильди. Невбеттеки вазифе: къурулаяткъан джамиде толаларны ташымагъа ярдым этмек.

Исматиллаевлернинъ эвинде алыпбарыджы биринджи невбетте буздолапнынъ ичини бакъып чыкъты ве аш-сув не иле фаркълангъаныны сораштырды. Белли олгъанына коре, ярышларгъа азырлангъан вакъытта Джамшид бир куньде 9 бинъ калория ашамакъ керек.

«Эки йыл эвельси мен бир эксперимент кечирдим. Мен бир саат ичинде учь кило къадар (эт — муаррир) ашадым», — дей пельван.

Эр кунь онынъ омюр аркъардашы онынъ янына дёрт контейнер этли аш къоя. Амма кучьлю олмакънынъ эсас рецепти, батырнынъ сёзлерине коре, чиберектедир. Къырымтатарларнынъ тамам бу эфсаневий емегини Глен Куцовски Джамшиднинъ апайы иле пиширип бакъты. О, бу аш файдалы емектен не къадар чокъ фаркъ эткенинден айретте къалды.

Беден кучюнинъ ич бир уникаль сырыны тапмагъан сонъ, алыпбарыджы бойле нетиджеге кельди: къырымлы йигит садедже частлы-бахтлы инсандыр.

«Мен озь якъынларымы пек севем. Яшамагъа севем. Мен яшагъан ерими пек бегенем. Озь Ватанымы севем. Къырымтатар олгъанымдан гъурурланам. Меним достларым чокъ, мен оларны пек севем ве урьмет этем. Меним имкянларымнынъ ве кучюмнинъ  сыра бунда олса керек», — деп, тасдыкълай Джамшид.