Къырым Джумхуриетинден РФ Девлет Думасынынъ мебусы Руслан Бальбек Исветчияда инсан акъ-укъукълары боюнджа ООН форумында чыкъышта булунды. Бу акъта о озь Facebook саифесинде язды.

«Шубесиз, мен мемнюним ве Исветчия акимиетине тешеккюрлер бильдирем, олар тек лафта дегиль де, иште де нейтралитет сиясети боюнджа арекет этелер, олар инсан акъ-укъукълары ве демократия суаллери боюнджа Бирлешкен Миллетлер Тешкиляты, яни ООН форумында сербест булунмагъа имкян бердилер. Эгер гъарбий мемлекетлер эписи бойле япса эдилер, олаяткъан шейге «къыйыш козьгюден» бакъмаса эдилер, — эминим, рус алеми ве гъарбий цивилизация арасында эписи давалы суаллер энди чезильген олур эдилер», — деп, язды Бальбек.

Руслан Бальбек эм де украин акимиетининъ тырышувларына сесленди, олар форумда мебус иштирак эткенини ред этмеге тырыштылар. Киевнинъ бир сыра кутьлевий малюмат васталары Украина тышъы ишлер назирининъ муавини Эмине Джеппарнынъ сёзлерине эсасланып, Девлет Думанынъ мебусы Исветчияда олмагъаны акъта хабер эттилер.

«Козьлеринъизни ачайым, гражданлар, — мен барым! Ве Женевада — инсан акъ-укъукълары боюнджа ООН форумынынъ топлашувында ресмий шекильде чыкъышта булунмагъа имкяным олды ве мен Къырымда инсанларнынъ ве миллетлернинъ укъукълары акъта озь нокътаи-назарымы сеслендирдим», — деп, къайд этти Бальбек.

Мебус эм де озь чыкъышынынъ видеосыны ве фотоларыны ерлештирди.