1920 сене октябрьнинъ 25-де Алупкада бир огъланчыкъ догъды, о, озь къорантасыны ве бирден эки халкъны мешур этти: бу лакцы миллети –бабасы Султан олардан эди, ве къырымтатарларны – анасы Насибе Садла къырымтатар эди. Оларнынъ огълу Амет-Хан Султан Совет Бирлигининъ эки дефа къараманы ве миллий гъурур объекти олды. Эр йыл онынъ догъгъан куню мемориаллар ве хатыра таблочыкълар ерлештириле, конференциялар ве тёгерек масалар топланыла, китаплар нешир этиле. О акъта хатыра гъает муим, ве йыл-йылдан Амет-Хан Султан земаневий инсанларгъа керек олгъаны анълашыла. Онынъ ады русиелилерге не ерде ве кимге яшамагъа ярдым эткени акъта, «Россия для всех» порталынынъ макъалесинде окъунъыз.

2018 сене къырымлылар Алупка мектебининъ азбарында учюджининъ бюстини ерлештирдилер, ве онъа Амет-Хан Султаннынъ ады берильди. Янъы мемориал «Герои Крыма» адлы джемаат арекетининъ тырышувлары иле пейда олды. Онынъ маиети шунда ки, генчлер тешеббюсчи олалар, къараман окъугъан мектепте бир де бир объектни ясайлар ве ерлештирелер: стеллалар, бюстлер, аллеялар ве иляхри.
«Амет-Хан Султан — бу акъикъий ватанперверлик, акъикъий дост мисали олгъаныны эр кес биле. О, Къырым ве бутюн мемлекетимиз  устюндеки темиз кокнинъ тимсалидир!

Алупкада онынъ хатырасына багъышлангъан музей огюнде Амет-Хан Султаннынъ бюсти

Мен бизге бойле имкян – акъикъий къарамангъа хатыра ишарет олгъан дегерли абиде къурмакъ имкяны берильгени иле гъурурланам ве Аллагъа шукюрлер айтам», — деп, къайд этти «Герои Крыма» адлы арекетнинъ темельджиси ве лидери Ибраим Ширин.

Эм де къырымтатарлар «Великие имена России» деген тешеббюске лякъайд къалмадылар, онынъ черчивесинде рей берюв ве кениш джемаат музакерелер иле халкъара ава лиманларгъа экинджи адлар бериле. Бойле иш дюньядадже белли ве къулланыла. Бойлеликнен, эр кес Парижде «Шарль-де-Голль» ве Истамбулда «Ататюрк» ава лиманларыны биле. Акъмесджитнинъ ава къапуларыны адламакъ ичюн башында бойде джедвель берильди: Екатерина II; шаир ве рессам Максимилиан Волошин; адмирал Павел Нахимов; Къырымда шарапчылыкънынъ темельджиси Лев Голицын; къырымтатар маарифчиси Исмаил Гаспринский; алим-хирург Николай Пирогов; рессам Иван Айвазовский; языджы Антон Чехов; алим Дмитрий Менделеев; языджы Александр Грин. Амма юкъарыда айтып кечильген эписи улу Къырым сакинлери я да мусафирлери авиация саасына алякъалары ёкъ. Ава лимангъа Амет-Хан Султаннынъ адыны бермек тешеббюснинъ тарихы исе саде дегиль. Чюнки энди Дагъыстанда – Махачкала ава лиманына энди онынъ адыны берип етиштирдилер. Эвеллери Акъмесджитнинъ ава лиманына бу ад берильмесине тамам шу ал кедер эте эди.

Амма къырымтатарлар, эльбетте, кене де учюджининъ адыны джедвельге кирсетмеге истедилер. Интерактив шекильде Амет-Хан Султаннынъ адыны Къырымнынъ ава къапулары ичюн экинджи ад оларакъ тевсие этмек чагъырувыны къырымтатарлар миллий-медений мухтариетининъ ёлбашчысы Эйваз Умеров сеслендирди.

«Джемиет тешеббюси иле ава лимангъа экинджи ад берилювине принципиаль я да къануний ясакъ ёкъ! Русиеде энди эки ава лиман дюньяда биринджи космонавт Юрий Гагариннинъ шерефине адландырылды (2011 сенеден Оренбург ава лиманы ве 2018 сене майыс айындан — Саратовнынъ янъы ава лиманы).  Сайтта Русиенинъ ава лиманлары энди ташыгъан улу инсанларнынъ адлары бериле, бу: Ростов-на-Дону (Матвей Платов), Саратов (Юрий Гагарин), Кемерово (Алексей Леонов), Магас (С.С. Осканов), Барнаул (Герман Титов), Ульяновск (Н.М. Карамзин)», — деп, къайд этти Умеров.

Онынъ сёзлерине коре, илян этильген сонъ тек биринджи алты саат девамында фикирдешлер тахминен  200 скриншот ёлладылар. Эр биринде «рей»  Амет-Хан Султангъа берильгени къайд этиле. Иссени эм де лейханынъ сайтында октябрьнинъ 28-не къадар къошмакъ мумкюн.

Махачкалада учюджининъ ады чокъусы объектлерге берильген. Биринджиден, ава лиман. Экинджиден, 2007 сене ава лиманнынъ огюнде ерлештирильген къараманнынъ бюсти. Учюнджиде, Амет-Хан Султаннынъ сокъагъы. Даа бир дагъ тёпесине Аметхан-Султан ады берильген. Эм де, сёз сырасы, Дагъыстанда учюджининъ адыны сыкъ алда къошып язалар.

Онынъ ады эм де кокте эбедийлештирильди – кичик сейяренинъ ады иле (6278) Амет-Хан. О, 1971 сене ачылгъан эди, онынъ ады исе 2002 сене берильди.

Амет-Хан Султангъа ильк буюк абиде Ярославльде 2010 сене ерлештирильген эди, анда учюджи къараманджа гъалебе къазангъан эди. 1942 сене майыснынъ 31-де о, бутюн арбий едекни масраф эткен сонъ «Юнкерс» бомбардировщик учакъны таран этти. Эки учакъ та йыкъылып башладылар, амма Амет-Хан Султан парашютни къулланып, озюни къуртарып етиштирди. Сонъра, Ярославль устюнде беджерильген джесарет ичюн Ленин ордени иле такъдирленди. Бу онынъ биринджи тараны эди.

© Фото с сайта «Герои страны»
Ярославльде Амет-Хан Султангъа абиде

2008 сене улькешынас Вера Кузнецова ве Ярославльде дагъыстанлылар диаспорасынынъ лидери   Асламбек Далгатов абиде ерлештирилювининъ тешеббюсчиси олды ве пара топлап башлады. Лякъайд инсанлар 17 млн рубле пара топламагъа ярдым эттилер.  Нетиджеде бюстни дагъыстанлы эйкельджи Магомед-Али Алиев яратты, о, эм де Махачкаладаки монументнинъ муэллифи ола. Къошма композицияны  Ярославль сакини Марк Маркович азырлады.

Абидени эфсаневий уруш кечкен ерде ерлештирдилер – шимди бу Авиаторов джеддеси. Тунч бюст эки стелла арасында ерлеше. Тёпеде олар учакъны яраталар. Ичинде – Совет Бирлиги эки дефа къараманынынъ эки йылдызы.

Ачылувда Дагъыстандан буюк эйет булунды, абиде исе ерли джемаат ичюн халкълар достлугъынынъ тимсали олды. 

Москвада Амет-Хан Султаннынъ мезары

Амет-Хан Султаннынъ сокъагъы Москвагъа якъын Жуковский  деген ерде де бар. Къараман Сталинград урушында иштирак эткени себебинден, Волгоград шеэринде де сокъакъ онынъ адыны ташый. 1941 сене кузьде учюджи Ростов-на-Дону шеэрини къорчалай. Бугунь бу шеэрде онынъ шерефине Амет-Хан Султан бурулышы ве мемориаль тахта бар. Атта Киевде онынъ бюсти Аллея Славы деген ерде тура.

Эльбетте, онынъ ады Акъмесджитнинъ меркезиндеки мейдангъа, Алупка, Судакъ, Кезлев, Красноперекопск, Кефе шеэрлеринде сокъакъларгъа берильди.

Эки дефа къараман Москвада Новодевьичий адлы мезарлыкъта дефн этильди. Анда о, барышыкъ вакъытта омюрининъ эксерий къысмыны кечирди.