Киев Халкъара  социология институты (КМИС) Украинада этникара икрах тедкъикъатлар малюматыны нешир этти. Энъ алчакъ севие украинлер, акъруслар ве руссларгъа нисбетен къайд этильди, энъ юксек севие – къытай, арап ве чингенелерге нисбетен. Къырымтатарлар миллет оларакъ руслар иле зиядедже ичтимаий месафеде булуналар, амма ехудийлер ве немселерге коре месафе азджа.

КМИС – 1992 сене темели къоюлгъан структура, бу украин-американ тедкъикъий ширкети, бугунь о, Киево-Могилянская академиасы иле ишбирликте булуна. Институтнынъ сайтында сымарышчылар сайысында ООН ве USAID къайд этильген.

Социологлар къайд этелер ки, 1994 сенеден 2007 сенегедже Украинада ксенофобия севиеси атрры, сонъра 2013 сенегедже бираз эксильди, 2014 сенеден сонъ исе кене де энъ юксек косьтергичлерге къайтты. Ксенофобия севиесине, КМИС берген малюматкъа коре, энъ чокъ бойле факторлар тесир эте: тасиль (онынъ севиеси не къадар юксек олса, ксенофобия о къадар азджа ола), эм де яшайыш шараити (койлернинъ сакинлери шеэр сакинлерине коре башкъа халкълар векиллеринен азджа къонушалар), малиевий статус (не къадар юксекче олса, ксенофобии о къадар азджа), эм де инсанларнынъ яшы (бу да яш арткъан сайын арта).

Социаль месафелер  иерархиясында кимер этник группалар биринджи ерде 2,18 индекси иле  украин тилинде къонушкъан украинлер ерлешелер – оларгъа нисбетен ичтимаий месафе энъ аз. Экинджи ерде (2,77) рус тилинде къонушкъан украинлер ерлеше. Учюнджи ве дёртюнджи ерлерни акъруслар (3,33) ве руслар (3,84) алалар. Бираз ярамайджа мунасебет иле Украина гражданлары лехлерге бакъалар (4,12). Ве тек алтынджы ерде – къырымтатарлар (4,35). Бундан сонъ джедвель бойле: канада сакинлери (4,36), ехудийлер (4,44), немселер (4,47), америкалылар (4,51), френклер (4,69), румынлер (4,84), къытайлылар (5,29), африкалылар (5,44), араплар (5,53), чингенелер (5,66).
Респондентлерге бойле алларда этник группаларгъа мунасебет насыл олгъаны акъта джевап бермеге тевсие эттилер: аиле азалары, якъын достлар, къомшулар, иште зенаатдашлар, Украина сакинлери, Украина мусафирлери. Энъ къатты джевап «Украинагъа къоймаз эдим».

Бойлеликнен украин тильде лаф эткен украинлер мевзусы боюнджа 60,01% къайд эттилер ки, аиле азалары оларакъ корьмеге истер эдилер.  Тамам бойле косьтергич рус тильде лакъырды эткен украинлерге бираз азджа — 43,56%. Бундан сонъ руслар (27,27%) ве акъруслар (25,78%). Къырымтатарларны сой-акъраба арасында соралгъанларнынъ  11,81% косьтеге азырлар. Бу «ашадан» алтынджы ер, олардан сонъ исе тек румынлер (9,9%), къытайлылар (6,24%), африкалылар (6,10%), чингенелер (5,95%), араплар (5,62%) къалдылар.

Амма «бу группа векиллерини Украина сакинлери киби корьмек» боюнджа косьтергич бу миллетке нисбетен энъ юксек олы  — 27,83%. Даа 24,92% къырымтатарларны Украина мусафирлери оларакъ корьмеге азырлар. Дост ве сой-соп олмагъа истегенлер боюнджа косьтергичлер бир-бирине якъын – 11,67%. Къырымтатарлар иле къомшу олмагъа 10,60% азыр, чалышмагъа – 4,34% истей. Тек 8,82% «къырымтатарларны Украинагъа къоймаз эдик» деп, джевап бердилер.

Сонъки нокъта даа зияде меракълы. Соралгъанларнынъ 40,67% чингенелерге нисбетен «Украинагъа къоймаз эдик» дедилер. Арапларгъа нисбетен  бу 22,77% ве африкалыларгъа 20,47. Бундан сонъ руслар (15,50%). Ве энъ алчакъ косьтергичлер украинлернинъ озюнде (украин тильде лаф эткенлер – 0,74%; рус тилинде лаф эткенлер – 3,26%), акъруслар (2,57%), френклер (3,98%).

Сорав 2018 сене сентябрьнинъ 8-ден 23-не къадар бутюн мемлекетнинъ территориясында 2026 респондент арасында кечирильди.

Украинанынъ дженюбий-шаркъий тарафы акъта   КМИС къайд эте ки, Луганск ве Донецк виляетлеринде олар тек «украин акимиети незарет эткен» территорияда гражданлар соралды.