РФ мудафаа назирлиги  июньнинъ 22-де, Хатыра ве кедер куню, Улу Ватан дженкининъ биринджи куньлери акъта сырлары ачылгъан весикъаларны нешир этти. Эписи нумайыш этильгенлер арасында  ильк сефер Ялтада догъгъан къырымтатары Саид Усейновнынъ джесарети тасвир этильген мукяфатланув кягъыты бар.

«24.6.41 сене Шара озени янында, Картуз-Берез ёнелишинде, батарея атеш иле уджум этюв акъта эмир алды», — деп башлана весикъанынъ метини. Кучьлю атешке бакъмадан, ракъип огге чыкъты, танклар атеш ачтылар.

«Силя команданы Усейнов силя огюнде бир озю къалды, къалгъанлар артыкъ чалышып олмай эдилер, оларгъа ракъипнинъ къырыджы авиациясы кедер этти. Амма къуршунлардан къоркъмайып, силя команданы Усейнов дос-догърудан ракъипнинъ танкларыны атмагъа девам этти. Чокъусы танклар алев иле къаплангъан олса да, душман озь арекетлерини девам эттирди. Ракъипнинъ сонъки танкы  атештен 150 метр месафеде эди, силя команданы гаубицаны танка къаршы 152 мм догъурлады  ве душманнынъ танкы янып башлады. Усейновнынъ къувансыны тасвир этмекнинъ чареси ёкъ. Усейнов гаубицанынъ лафетине чыкъып, ойнап башлады, бу комсомолец Усейновнынъ гъалебе къуванчы эди», — деп, яза 141 ГАП 9 батарея командир муавини  Омельянович.

Бойлеликнен, кендже сержант Усейнов бир озю учь немсе танкны иштен чыкъарды.

Озь джесарети ичюн «Къызыл байракъ» ордени иле такъдирленди.

Усейнов Саид Халиль, весикъагъа бинаен, 1919 сене догъды, ве «Ялта шеэри, Кузель-Таш эви» адреси боюнджа даима яшады.

Къараманджа дженклешкен къырымтатарлар акъта ве оларнынъ эдждатлары акъта башкъа икяелер бу ерде>>