Миллетлер ишлери боюнджа Девлет дума комитети РФ территориясындан эвель сюргюн этильгенлерни къанунлаштырмакъ ичюн ишлеп чыкъарылгъан къанунлейхалар боюнджа мусбет нетиджелерни къабул этти. Бу акъта озь Facebook саифесинде Девлет дума мебусы  Руслан Бальбек хабер этти.

«Бойлеликнен, Къырым АССР джумхуриетинден къанунсыз сюргюн этильген гражданлар Русие территориясында булунув муддетлерни бозгъанлары ичюн мемурий джеэттен джезаланмайджакълар (оларгъа пара джезасы тайинленмейджек ве Русие Федерациясы территориясындан къувмайджакълар). Бундан гъайры, бойле бозувлар ичюн мемурий месулиетликке джельп этилюв вид на жительство весикъаларыны эльде этмеге маниа олмайджакъ. Бойлеликнен тахминен 5000 адамнынъ меселеси чезиледжек, олар тап 2014 сене март айынадже Къырым территориясында къанунсыз яшай эдилер. Чюнки весикъаларыны ресмийлештирип олмай эдилер», — деп, яза Руслан Бальбек.

Эм де янъы кирсетильген мадделер шимди ярымадада яшагъан ве оларгъа нисбетен къанунсыз репрессиялар къулланувыны беклегенлерге вид на жительство весикъаларыны эльде этмеге ярдым этеджек.

Бундан гъайры 2014 сененинъ мартнынъ 18-недже яшагъан еринден чыкъып ярымададан тыш кеткен Къырым ве Акъяр сакинлерине саделештирильген шекильде Русие гражданлыгъыны ресмийлештирмеге имкян берген мусбет екюн чыкъарылды. Къайткъан сонъ олар русие паспортыны алгъанда къыйынлыкъларгъа расткельдилер. Чюнки бу весикъаны алмакъ ичюн Къырым Русие иле бирлешкен вакъытта мында олмакъ керек эди.

Хатырлатамыз, 2017 сене РФ Девлет думасы «РФ четэль гражданларнынъ укъиукъий вазиети акъта» Федераль къанунгъа денъишмелерни къабул этти. Денъишмелерге нисбетен, Къырым АССР территориясындан сюргюн этильген сакинлерге я да оларнынъ якъын тувгъандарына вакъытынджа яшамакъ ичюн изин алмайып, вид на жительство, деп адландырылгъан весикъаларны эльде этмеге акълары бар.