Къырым Джумхуриетининъ башы Сергей Аксенов Къырымнынъ реабилитация этильген халкълары гъайрыдан тикленюв кунюне тедбирлер планыны азырламакъны авале этти. Бу акъта Джумхуриетнинъ акимиет сайтында нешир этильген эмирде сёз юрьсетиле.

Бу кунь эр йыл апрельнинъ 21-де къайд этиле. Тамам шу куню 2014 сене РФ президенти  "Эрмяни,  булгъар, урум, итальян, къырымтатар ве немсе халкъларынынъ реабилитациясы ве оларнынъ гъайрыдан тикленилювине ве инкишафына девлет дестеги боюнджа  чарелер акъта" эмирини имзалагъан эди.

Тедбирлер планында Акъмесджитте ве башкъа шеэрлерде миллий бедий коллективлернинъ концертини ве амелий-суслю санат усталары япкъан шейлернинъ сергисини кечирмек тевсие этиле.

Бундан гъайры, Къырымнынъ тасиль назирлигине мектеплерде Къырымнынъ реабилитация этильген халкълары гъайрыдан тикленюв кунюне багъышлангъан екяне дерс кечирмек авале этильди.