Къырым муфтисининъ муавини Эсадуллах Баиров "Земаневий Русиеде дюньябакъышнынъ бирдемлиги ве адетлернинъ фаркълылыгъына эсасланып, девлет — конфессионал мунасебетлернинъ инкишафы" ильмий-амелий конференциясында иштирак этти. Тедбир Нижегород девлет мимарджылыкъ-къуруджылыкъ университетинде олып кечкен "Чешитликте бирлик" Бутюнрусие динлерара лейхасы черчивесинде тешкиль этильди.

Конференция черчивесинде иштиракчилер экстремизм ве терроризмге къаршы девлет ве джемиетнинъ умумий фаалиети, джемиет, девлет ве диний тешкилятлар арасындаки ишбирликнинъ янъы ёнъелишлери, Русие миллетлерининъ бирдемлигинде тарихий хатыранынъ муимлиги киби актуаль мевзулар музакере этильди.

Русиенинъ ичтимаий аятында фаркълы дин ве миллетлер яшагъан этник ве диний факторларнынъ эмиетини изаат эткенде, Эсадуллах Баиров девлет-конфессионал мунасебетлернинъ муимлигини айрыджа къайд этти. "Инкишаф этмек ичюн имкянлар, мусулман кендисини джемиетнинъ там манада азасы оларакъ сайгъан шараитнинъ мейдангъа кетирилюви, кейфиетли рухий джеэттен тербиеленюв ве тасиль — экстремизге къаршы энъ гузель иляджтыр", — деп къайд этти Эсадуллах Баиров.

Конференцияда 500-ден зияде инсан — РФ Президенти Мемуриетининъ векиллери, Русие ФАДН, РФ МОиН, Русие Президенти янында чалышкъан дин джемиетлери иле ишбирлик Шурасы ве миллетлерара мунасебетлер Шурасы, Русие динлерара Шурасы, диний ве миллий тешкилятлар, бундан да гъайры, Приволжск федерал больгеси Джемаат палатасынынъ азалары иштирак этти.

Конференциянынъ нетиджесинде Русие меркезий диний тешкилятларына девлет-диний мунасебетлернинъ къавийлешмесинде фааль иштирак этмеге теклиф эттилер. Бундан да гъайры, конференция черчивесинде Булгъар ислям академиясына, онынъ тарафындан миллетлерара ве динлерара барышыгъынынъ сакъланылмасы ичюн чешит лейха ве программларнынъ амельге кечирилюви ичюн тешеккюрлер бильдирдирильди.
КЪМДИ матбуат меркези