Акъмесджитте бокс боюнджа «А» класс Умумрусие 38-нджи ярышлар екюнленди. Олар Украинада нам къазангъан идманджы, боксчы-профессионаллар арасында эки дефа Авропа чемпионы, СССР джыйма такъымынынъ консультанты Педро Саэс Бенедиктонынъ хатырасына багъышланды. Турнирде Къырым Джумхуриети, Акъяр, Ростова-на-Дону, Краснодар дживары, Белгород, Москва, Рязань, Дагъыстан Джумхуриети, Липецк, Астрахань, Чеченистан Джумхуриети, Самара ве мемлекетимизнинъ дигер шеэрлеринден кельген юзге якъын энъ кучьлю спортчылар иштирак эттилер.
«Мен турнир тешкилятчыларына бу турнирни кечирмек аньанесини девам эткенинъиз ичюн тешеккюрлер бильдирмеге истейим. Бу адалетлидир, чюнки Педро Саэс Бенедикто юксек севие мутехассысы, идманджы ве устаз эди. О, Къырымда чокъ талебелер азырлады. Бокс бизим джумхуриетимизде сурьат иле инкишаф эте. Кет-кете чокъча балаларны умумрусие ярышларына ве Русие джыйма такъымлары теркибине кирмек ичюн топлашувларгъа ёллай билемиз. Ве бу ишни биз девам эттирермиз», — деп, къайд этти КъДж спорт назири Елизавета Кожичева.


Турнир нетиджелери боюнджа Къырым спортчылары беш алтын медальни къазандылар: Ахтем Закиров (онынъ чеки категориясы — 52 кг), Ильяс Белялов (онынъ чеки категориясы — 56 кг), Артем Булатов (онынъ чеки категориясы — 64 кг), Сергей Лапин (онынъ чеки категориясы — 81 кг) ве Артем Гордеев (онынъ чеки категориясы — 91 кг). Бундан гъайры озь чеки категорияларында Белгород виляетинден Мурат Алиев (60 кг) Дагъыстанлы Магомед Ашалаев (69 кг) ве Иса Бегаев (75 кг) ве Ставрополье дживарындан Ярослав Дороничев (+ 91 кг) гъалип чыкътылар.


Эм де учь къырым спортчысы къошма мукяфатлар иле такъдирлендилер: Асяев Даниил гъалебеге ынтылувы ичюн, Артем Булатов — энъ гузель боксчы оларакъ, Сергей Лапин исе — энъ гузель техник-тактик азырланув ичюн.
msport.rk.