Къырымда кескин респиратор вирус хасталыкълар севиеси котериле. Бу акъта "Спутник в Крыму" радиосынынъ эфиринде Роспотребнадзор Къырым идаресининъ башы Наталья Пеньковская тариф этти.

Хасталанув мониторингм косьтере ки, къырымлылар эпидемия девири огюнде булуналар. Профиль идареде хасталанув севиеси тахминлерге коре декабрьнинъ сонъунда котериледжек, дейлер.

"Ярымадада хасталанув севиеси эпидемик сынъырдан алчакъ, ярымаданынъ ич бир регионында о бундан зияде котерильмей. Амма кечкен афтагъа бакъкъанда биз хасталанув севиеси 12,5% арткъаныны къайд этип башладыкъ — деп, тариф эте Пеньковская. — Бир A(H1N1) грипп вакъиасы къайд этильди, бу да адеттен тыш шей дегиль, вируслар территорияда айланып юрелер ве олар хасталыкъларгъа чевириле билелер. Эсасы — керекли дереджеде мукъайт олмакъ".

Буннен берабер шимдилик ярымада эалиси арасында ОРВИ иле хасталанув эпидемик сынъырдан баягъы алчакътыр: Къырымда — 25 файызгъа, Акъярда исе — 21 файызгъа.