Яш мутехассыслар ичюн Career.ru порталы къайд эте ки, эр бир учюнджи русиели студент рус тасиль системасыны энъ семерели деп сая. Бунынънен бирге гъарп тасильнинъ устюнлигинде юкъары окъув юртларынынъ 24% талебелери шубеленмейлер.

Къайд этмели ки, юкъары окъув юртнынъ тасиль кейфиетинен умумен рус студентлернинъ чокъусы (73%) разы, бунынънен берабер сонъки эки йылда мемнюнликнинъ севиеси якъын 10% осьти. 

Соралгъан яш мутехассысларнынъ ярысындан азы (43%) ихтисас боюнджа бильгилери етишмегенини сезелер, ве буны чокъусы вакъыт дизайн, маркетинг, юриспруденция, ихтисадиет ве менеджмент факультетлернинъ мезунлары къайд этелер.

Тасиль системасына менфий мунасебетни студентлернинъ ярысындан чокъу умумен тасиль программасы земаневий акъикъаткъа уйгъун олмагъанынен (60%) багълайлар - оларнынъ фикирине коре, чокъ вакъыт юкъары окъув юртында чокътан эскирген шейлерни огретелер, программа исе земаневий теракъкъий технологиялар огренювини козьде тутмай.

Тасильнинъ къанаатлендирмейиджи алда олгъанында студентлернинъ чокъусы юкъары окъув юртларнынъ башлыгъыны (45%) я да девлетни (24%) къабаатлайлар.

Сорав яш мутехассыслар ичюн Career.ru порталы тарафындан 2014 сене 17-24 сентябрь куньлери 1137 студент арасында кечирильди.

Career.ru - карьера къурмагъа ынтылгъан студентлер ичюн иш къыдырув ве стажлав сайты.  Эр кунь Career.ru сайтында студентлер ве мезунлар ичюн докъуз бинъден зияде актуаль бош ер, яни вакансия,  ве бинъден зияде стажлав теклифлери макъбулдыр. Career.ru -  «Государство и Общество» номинацияда «Премии Рунета 2009» лауреаты.  Career.ru сайтына къатнав айда 2 миллиондан зияде  озьгюн къатнайыджыныны тешкиль эте. Сайт HeadHunter ширкетине аит.