Насыл бир аджайип кучь инсанларны театрге джельп эте ве анда кене ве кене къайтмагъа, бу ерде эр кез ичюн даимий олгъан, эр кимни раатсызлагъан ве муим суаллерге джеваплар араштырмагъа меджбур эте?! Бирисилери, театрге севда олып, онынъ мухлислерине чевирилелер ве янъы кешивлер, корюшювлер, текрарланмаз теэссюратлар беклейлер. Башкъалары ичюн исе о яшайыш манасы, зенаат, омюрлик севги ве джошкъунлыкъ олып къала…

Театр иле не къыяслана биле? Ондан гузель ве ондан къыйын не ола биле?

Оны севген, оны анъламагъа ве огренмеге истеген ичюн о акъикъаттен ачыла, янъы дуйгъулар багъышлай, гонъюльни чалышмагъа, къараманларгъа дуйгъудашлыкъ ис этмеге, олар иле берабер къуванмагъа ве азапланмагъа меджбур эте.

Дюньяда екяне олгъан къырымтатар теати сейирджилерни эр заман терен маналы премьераларнен ве актерларнынъ усталыгъынен айретте къалдыра. Режисcёр, озь ишининъ акъикъий устасы Билял Билялов кене де ярымада сакинлерини ве мусафирлерни къувандырды. Бу сефер о «Къудалар» комедиясыны такъдим этти. Салонда бош ер къалмады, спектакльни зиярет этмек, мусбет дуйгъулардан зевкъ алмакъ ичюн чокътан-чокъ инсан топланды.

Шенъ саналаштырув, санадаки меракълы чезюв ёллары, актёрлар роллерини аджайип иджар этюви, фельсефий джеэттен терен, эм де буннен берабер анълайышлы ве саде метин! «Къудалар» комедиясыны мен тамам бойле тасвир этер эдим.

Спектакиль аилевий мунасебетлер мевзусыны айдынлата, актёрлар комедия жанры вастасынен бутюн сейирджилерни текрарланмаз дуйгъулар алемине далдыралар, яшайыштаки муим адиселерге четтен козь атмагъа имкян яраталар.

Спектакльнинъ серлевасы, яни «Къудалар» дегени онынъ мундереджесини анъламакъ ичюн эсас нокътадыр. Бу спектакль ана-балалар озь эвлядларына багъышлагъан сынъырсыз севгиси акъкъында, бу севги эписи маниаларны кече ве якъынларны къорчалай. Лякин ана-бабаларнынъ инатлыгъы ве бир сёзде тургъанлары бу алда эки севдагъа аиле къурмагъа кедер эте. Тамам къудалыкъ этильгенде йигит ве къызнынъ балалары олмайджакъ бир шейден къавгъа чыкъаралар ве нианны къайтаралар. Эки тарафны барыштыргъан кучь оларакъ оладжакъ келиннен киевнинъ аналары чыкъалар. Спектакльге айры бир тюс берген шей — бу эки яшнынъ сой-акърабасы лакъырды эткен ялыбою ве ногъай шивелери. 

Спектакльнинъ сюжети меракълы олгъаны себебинден сейирджилер текрарланмаз теэссюратлар алалар. Мутешем саналаштырув, келишикли кийимлер ве дюльбер декорациялар, актерлар усталыгъы — булар эписи сейирджилерни первасыз къалдырмады. Премьера екюнленген сонъ даа чокъ вакъыт миннетдар сейирджилернинъ эльчырпмалары эшитиле эди.

«Къудалар» комедиясыны сейир этмеге етиштирмеген инсанлар ичюн къырымтатар театри озь къапуларыны июньнинъ 15 ые 22 куньлери ачаджакъ.